سام سنگ نے گلیکسی نوٹ 8 لانچ کر دیا

11

سام سنگ نے اپنا نیا گلیکسی نوٹ 8 فون لانچ کرنے کا باضابطہ اعلان کر دیا جو ان قیاس آرائیوں کی تصدیق کرتا ہے جن میں کہا گیا تھا کہ گلیکسی نوٹ کو ایپل 8 سے پہلے ہی پیش کر دیا جائے گا۔

گلیکسی نوٹ 8 کے اجرا کی مزکزی تقریب نیویارک میں ہوئی جس میں خاص ’انفنٹی ڈسپلے‘ کے علاوہ دو بیک کیمرے اور دیگر اہم فیچرز شامل ہیں۔ ان سب سے بڑھ کر گلیکسی نوٹ 8 کی بیٹری کو کئی طرح کے سیکیورٹی چیک سے گزارا گیا ہے کیونکہ گزشتہ برس گلیکسی نوٹ سیون کی بیٹری میں ازخود آگ لگنے کے درجنوں واقعات کے بعد کمپنی نے لاکھوں فونز دوبارہ طلب کر لیے تھے۔

واضح رہے کہ سال 2011 میں سام سنگ نے گلیکسی نوٹ کے ذریعے فیبلٹ سیریز کی ابتدا کی تھی جسے فون اور ٹیبلٹ کا امتزاج کہا جا سکتا ہے۔ اب گلیکسی نوٹ 8 کے وہی فیچرز ہیں جو وقفے وقفے سے جاری کئے جاتے رہے تھے ان میں بڑی اسکرین، دیر تک چلنے والی بیٹری، اور دیگر اہم خصوصیات شامل ہیں۔

زبردست فیچرز کے حامل گلیکسی نوٹ 8 میں اینڈروئڈ 7.1.1  نوگاٹ، 6.3 انچ کواڈ انفنٹی پلس ڈسپلے اور فرنٹ و بیک کیمرے 12 میگا پکسل ہیں۔ گلیکسی نوٹ 8 میں بایومیٹرک سیکیورٹی کے بہت سے آپشنز فراہم کئے گئے ہیں جن میں چہرے، آنکھ اور انگشت (فنگر) پرنٹ اسکیننگ سہولیات میں سے کسی ایک کا انتخاب کیا جا سکتا ہے۔

سام سنگ موبائل کے صدر ڈی جے کوہ کے مطابق اس کا ایس پین مزید اسمارٹ بنایا گیا ہے اور کیمروں کو پہلے کے فونز کے مقابلے میں مزید بہتر اور طاقتور کیا گیا ہے۔ ان سب کے باوجود سام سنگ کمپنی کے سامنے سب سے بڑا چیلنج گلیکسی نوٹ سیون کی تلخ یادوں اور تجربات کو زائل کرنا ہے جس نے کمپنی کی ساکھ کو شدید نقصان پہنچایا ہے اور تجزیہ کاروں نے اس فون کو مکمل طور پر ناکام قرار دیا تھا۔

تاہم اب سام سنگ نے یقین دلایا ہے کہ گلیکسی نوٹ 8 کی بیٹری اور اس کے نظام کو سخت ترین معیارات پر جانچا گیا ہے۔ فون کے نیچے اسٹائلس سلاٹس سے کئی اہم فیچرز کا انتخاب کیا جا سکتا ہے جن میں اسکرین پر ڈرائنگ، اینی میٹڈ گفس، ایموجی اور فوری ترجمے جیسی سہولیات شامل ہیں۔

گلیکسی نوٹ 8 ڈیکس ایسسریز کو سپورٹ کرتا ہے اور اسمارٹ فون کمپیوٹر، ماؤس اور کی بورڈ سے منسلک ہو سکتا ہے۔ اس کے علاوہ ایک ساتھ دو ایپس پر بھی کام کیا جاسکتا ہے۔ اس کی پشت پر 12 میگا پکسل کے دو عدد کیمرے نصب ہیں جو وائڈ اینگل لینس کی طرح تصویر لینے کی سہولت فراہم کرتا ہے جبکہ ہاتھوں میں ارتعاش کو زائل کرنے کے فیچر سے انتہائی صاف تصاویر لی جا سکتی ہیں۔

تجزیہ کاروں کے مطابق سام سنگ نے ایپل آئی فون 8 سے قبل نوٹ 8 متعارف کرانے کا درست فیصلہ کیا ہے اور اس کے تین ماڈل پیش کیے ہیں جنہیں گلیکسی نوٹ 8، ایس 8 اور ایس 8 پلس کا نام دیا گیا ہے۔

واضح رہے کہ سادہ یعنی گلیکسی نوٹ 8 کی ریم 6 ہے جسے مائیکرو ایس ڈی کارڈ سے بڑھایا جا سکتا ہے۔ بلیوٹوتھ 5 کے ساتھ یہ برطانیہ میں بلیک اور گولڈ کلر میں دستیاب ہے جبکہ گرے اور بلیو رنگ کے فون دیگر خطوں کے لیے مخصوص ہیں۔

لانچ کے ساتھ ہی اس فون کی بکنگ کرائی جا سکتی ہے جو 90 ہزار سے ایک لاکھ روپے تک میں دستیاب ہے جبکہ اس کی فراہمی 15 ستمبر سے شروع ہو گی۔