سراج الحق کا موجودہ نظام کے خلاف بغاوت کا اعلان

7

جماعت اسلامی نے ایبٹ آباد میں خوب عوامی رنگ جمایا، سراج الحق کا کہنا تھا کہ نواز شریف پوچھتے پھر رہے ہیں کہ انہیں کیوں نکالا؟ بچہ بچہ جانتا ہے انہیں کیوں نکالا گیا، جلسے میں کارکنوں کی بڑی تعداد نے شرکت کی۔

ایبٹ آباد: (فلک نیوز) جماعت اسلامی کے جلسے سے خطاب کرتے ہوئے سراج الحق نے کہا کہ کہیں نہیں لکھا کہ ایک خاندان ستر سال تک مسلط رہے، حکمرانوں نے ملک لوٹنے کے سواء کچھ نہیں کیا۔ سراج الحق نے موجودہ نظام کے خلاف بغاوت کا اعلان بھی کر ڈالا، کہتے ہیں ہمارے پاس درہم و دینار اور ڈالر نہیں ہیں، اخلاق کا سرمایہ ہے، سپریم کورٹ کے پانچ رکنی بنچ کے سربراہ نے کہا کہ 62،63 پر عمل ہوا تو صرف سراج الحق بچے گا، تکبر اور غرور کیوجہ سے نواز شریف کو جہاز سے اتر کر جی ٹی روڈ جانا پڑا۔ سراج الحق نے مزید کہا کہ نواز شریف کہتا ہے کہ مجھے کیوں نکالا؟ نواز شریف کو تکبر اور غرور نے نکالا، 31 سال تک نواز شریف نے اگر خدمت کی ہوتی تو آج مریم نواز کو ووٹ نہ مانگنے پڑتے۔ امیر جماعت اسلامی سراج الحق نے مزید کہا کہ ملک میں غربت، کرپشن اور مہنگائی شریف خاندان کیوجہ سے ہے، اگر ملک سے کرپشن کا خاتمہ چاہتے ہیں تو جماعت اسلامی کا ساتھ دیں، جماعت اسلامی کی حکومت آئی تو پرائیویٹ سکولوں میں بھی بچوں کی فیس حکومت ادا کرے گی، ہر نوجوان کو روزگار ملنے تک بے روزگاری الاؤنس دیں گے، اللہ نے موقع دیا تو تمام چوروں کو ڈھونڈ کر سزائیں دلوائیں گے، ایک بار احتساب ہو گیا تو ملک پاک ہو جائے گا۔