پی ٹی آئی اور متحدہ کے نام رد، پی پی کا تسلیم، جسٹس جاوید اقبال چیئرمین نیب نامزد

4

فیصلہ ہو گیا، چیئرمین نیب کیلئے جسٹس ریٹائرڈ جاوید اقبال کا نام فائنل، پی ٹی آئی اور متحدہ کی جانب سے ملنے والے نام میرٹ پر پورے نہیں اترے، خورشید شاہ کی میڈیا سے گفتگو۔

لاہور/روہڑی: (فلک نیوز) تعلقہ ہسپتال میں انسدادِ پولیو مہم کے افتتاح کے موقع پر میڈیا سے بات کرتے ہوئے اپوزیشن لیڈر سید خورشید شاہ نے نئے چیئرمین نیب کے نام کا اعلان کیا۔ اس موقع پر بات کرتے ہوئے ان کا کہنا تھا کہ دعا ہے معاملے پر سیاست نہ کی جائے، بہت مشاورت کے بعد حکومت سے نام پر اتفاق ہوا۔ جسٹس ریٹائرڈ جاوید اقبال یکم اگست 1936ء کو کوئٹہ میں پیدا ہوئے۔ 1968ء میں پنجاب یونیورسٹی سے ایل ایل بی کی ڈگری حاصل کی۔ 1971ء میں یونیورسٹی آف ویسٹرن آسٹریلیا سے انٹرنیشنل لاء میں ایل ایل ایم کیا اور 1985ء میں انٹرنیشنل اسلامک یونیورسٹی اسلام آباد سے اسلامک لاء میں ماسٹرز کی ڈگری حاصل کی۔ جسٹس ریٹائرڈ جاوید اقبال کی 1993ء میں بلوچستان ہائی کورٹ میں ایڈیشنل جج کے طور پر تقرری ہوئی۔ انہوں نے پی سی او کے تحت 1999ء میں بلوچستان ہائیکورٹ کے جج کے طور پر حلف لیا۔ 2000ء میں چیف جسٹس بلوچستان ہائی کورٹ کا عہدہ سنبھالا۔ 2004ء سے 2011ء تک سپریم کورٹ آف پاکستان کے سینئر جج رہے۔ جسٹس جاوید اقبال نے 2007ء میں پی سی او کے تحت حلف اٹھانے سے انکار کیا۔ 2011ء میں ایبٹ آباد کمیشن کی سربراہی کی اور وزیر اعظم نواز شریف کو اس کیس کی رپورٹ پیش کی۔