اسلام آباد(نامہ نگار سے) بین الاقوامی اسلامی یونیورسٹی اسلام آباد کے فیصل مسجد کیمپس میں جاری انٹرنیشنل کانفرنس کے تیسرے روزعزت مآب جسٹس ڈاکٹرمحمد خالد مسعود نے “گلوبلائزیشن اور بین الاقوامی اسلامی قانون” کے موضوع پر کلیدی مقالہ پڑھا۔
اس کانفرنس میں چھ یورپی ممالک سے آئے ہوئے محققین سمیت بین الاقوامی اسلامی یونیورسٹی اسلام آباد کے پروفیسرز اور ادارہ تحقیقات اسلامی اسلام آباد کے محققین نے شرکت کی۔ کانفرنس کے بعد عزت مآب جسٹس ڈاکٹرمحمد خالد مسعود ادارہ تحقیقات اسلامی کے انچارج شعبہ مطبوعات ڈاکٹر افتخار الحسن میاں کے دفتر تشریف لائے۔ اس موقع پر مختلف زیر طباعت کتابوں کے علاوہ تحقیقی و علمی موضوعات پر تفصیلی تبادلہ خیال ہوا۔
ڈاکٹرافتخار الحسن میاں نے بتایا کہ ادارہ تحقیقات اسلامی امسال یوم اقبال (9 نومبر) کے موقع پرعزت مآب جسٹس ڈاکٹرمحمد خالد مسعود کی تصنیف ” اقبال کا تصور اجتہاد ” شائع کررہا ہے۔انہوں نے عزت مآب جسٹس ڈاکٹرمحمد خالد مسعود کو کتاب کی تقریب رونمائی میں خصوصی شرکت کی دعوت دی اور ان سے درخواست کی کہ وہ اس موقع پر کتاب کے موضوع کی مناسبت سے کلیدی خطبہ ارشاد فرمائیں۔
