ڈی جی آئی ایس پی آر کو معیشت پر بیانات سے گریز کرنا چاہیے: احسن اقبال

7

وفاقی وزیر داخلہ احسن اقبال کا کہنا ہے کہ غیر ذمہ دارانہ بیانات ملکی ساکھ متاثر کر سکتے ہیں۔

اسلام آباد: (فلک نیوز) وفاقی وزیر داخلہ احسن اقبال نے پاک فوج کے ترجمان میجر جنرل آصف غفور کے بیان پر ردعمل دیتے ہوئے کہا ہے کہ انھیں معیشت پر بیانات سے گریز کرنا چاہیے کیونکہ غیر ذمہ دارانہ بیانات ملکی ساکھ متاثر کر سکتے ہیں۔ ذرائع کے مطابق احسن اقبال نے اپنے بیان میں کہا کہ ٹیکسوں کی وصولی میں دوگنا سے زائد اضافہ ہوا ہے۔ ملک کی تاریخ کے سب سے بڑے ترقیاتی بجٹ پر عمل ہو رہا ہے۔ سیکیورٹی آپریشنز کے لئے بھی وسائل فراہم کئے جا رہے ہیں۔ اب ہمیں آئی ایم ایف پروگرام پر جانے کی کوئی ضرورت نہیں ہے۔ وفاقی وزیر داخلہ نے کہا کہ 2013ء کے مقابلے میں پاکستان کی معیشت بہت بہتر ہے۔ توانائی کے منصوبوں اور بجلی کی فراہمی سے صنعتی شعبے میں سرمایہ کاری سے درآمدات پر دباؤ پڑا جو قابل برداشت ہے۔ ان کا کہنا تھا کہ پاکستان کی معیشت مستحکم ہے۔ غیر ذمہ دارانہ بیانات پاکستان کی عالمی ساکھ متاثر کر سکتے ہیں۔ ڈی جی آئی ایس پی آر کو معیشت پر بیانات اور تبصروں سے گریز کرنا چاہیے۔