اوسلو- آقائے دوجہاں محمد مصطفی ﷺ کے میلاد کا اصل مقصد شریعت اسلامیہ کو عملی طور پر اپنانا ہے۔علامہ فرحت حسین شاہ

11

اوسلو(عقیل قادر)بزم نقشبند اوسلو کے مرکز پر میلاد مصطفیﷺ کانفرنس کو نہایت ہی عقیدت و احترام سے منایا گیا اورمرکز بزم نقشبند کو بہت ہی خوبصورت انداز میں رنگ برنگی جھنڈیوں غباروں ،پھولوں اور لائٹس سے سجایا گیا تھا۔ میلاد النبی ﷺ کانفرنس میں بڑی تعداد میں عاشقان رسولﷺ نے شرکت کی۔پروگرام کا آغاز تلاوت قرآن پاک سے قاری رحمت الہیٰ نے کیا ۔ حضور نبی کریم ﷺ کی بارگاہ اقدس میں عقیدتوں کے پھول پاکستان سے تشریف لائے ہوئے معروف مہمان نعت خواں عابد معصومی اورد یگر مقامی نعت خوانوں نے نچاور کیے اور حاضرین اپنے جذبات کا اظہار نعرہ تکبیر و رسالتﷺ سے کرتے رہے۔میلاد کانفرنس کے مہمان خصوصی پاکستان سے تشریف لائے ہوئے علامہ فرحت حسین شاہ نائب ناظم اعلیٰ علماء کونسل منہاج القرآن انٹرنیشنل تھے ۔ انہوں نے خوبصورت انداز میں نہایت مدلل خطاب کیا جس میں انہوں نے میلاد پاک کی اہمیت کو قرآن و حدیث سے اجاگر کیا۔ انہوں نے کہا کہ اللہ کی ذات ہر چیز عطا کرتی ہے مگر اسی ذات نے اپنے بندوں کے ذریعے ایک دوسرے کے لیے وسیلہ پیدا کیا اور توفیق عطا کی کہ بندہ ہو کر بھی لوگوں کی مدد کی جائے اور انکی ضرورتیں پوری کی جائیں۔ انہوں نے مزید کہا کہ جو بندہ لوگوں کی ضرورتیں پوری کرتا ہے اللہ پاک اس کو اور زیادہ عطا کرتا ہے اور صلے میں اپنی قربت عطا فرماتا ہے ۔میلاد کانفرنس میں اوسلو اور گرد ونواح سے علمائے کرام نے بھرپور شرکت کی۔پروگرام کی نقابت کے فرائض بزم نقشبند کے امام و خطیب علامہ نصیر احمد نوری نے احسن انداز میں سر انجام دئیے۔ پروگرام کا اختتام درود و سلام سے کیا گیا اورمہمانوں کی تواضع کے لیے میلاد ضیافت کا بہترین انتظام و انصرام کیا گیا تھا۔