رانا افضل کی تقرری کا نوٹیفکیشن آج جاری ہونے کا امکان ہے جو منگل کو عہدے کا حلف اٹھائیں گے: ذرائع
اسلام آباد: (فلک نیوز) حکومت نے پارلیمانی سیکریٹری رانا افضل کو وزیر مملکت خزانہ بنانے کا فیصلہ کر لیا۔ ذرائع کے مطابق رانا افضل کی تقرری کا نوٹیفکیشن آج جاری ہونے کا امکان ہے جو منگل کو عہدے کا حلف اٹھائیں گے۔ اسحاق ڈار کی رخصت کے باعث وزیر خزانہ کا عہدہ خالی تھا۔ رانا افضل این اے 82 فیصل آباد سے رکن قومی اسمبلی ہیں۔
خیال رہے اسحاق ڈار نے بیماری کے باعث تین ماہ چھٹی کی درخواست کی جسے وزیراعظم نے منظور کر لیا تھا۔ اسحاق ڈار کی جانب سے وزیراعظم کو 20 نومبر کو لکھے گئے خط میں کہا گیا تھا کہ آپ کے علم میں ہے، میں 27 اکتوبر کو کانفرنس میں شرکت کے لیے تاجکستان گیا، کانفرنس کے اختتام پر عمرے کی ادائیگی کے لیے سعودی عرب چلا گیا۔ شیڈول کے مطابق مجھے 29 اکتوبر کو اسلام آباد آنا تھا، عمرے کی ادائیگی کے دوران میں نے سینے پر درد اور دباؤ محسوس کیا۔ انہوں نے خط میں لکھا کہ مقامی ڈاکٹر نے مجھے اپنے پرانے دل کے ڈاکٹر سے رجوع کرنے کا کہا، 29 اکتوبرکو لندن کے ڈاکٹرنے انجیوگرام کرانے کا مشورہ دیا، رپورٹ کی روشنی میں ڈاکٹر نے مزید ٹیسٹ تجویز کئے۔ ڈاکٹر نے مجھے ہوائی سفر سے گریز کرنے کا مشورہ دیا۔
خط میں مزید کہا گیا کہ ڈاکٹر کے مطابق تجویز کردہ ٹیسٹ 27 نومبر کو ہونے ہیں۔ 27 اکتوبر سے اب تک فون اور دیگر ذرائع سے اپنے دفتری امور سرانجام دیتا رہا، جولائی 2017 سے ہونے والی تبدیلیاں معاشی شعبے میں سخت کام کی متقاضی ہیں۔ اس صورتحال میں میرے خیال میں مجھے مکمل صحتیابی تک چھٹی لے لینی چاہیے۔ آپ سے درخواست ہے مجھے سیکشن 17 کے تحت بغیر معاوضے کے چھٹی عنایت کی جائے۔ یہ بھی درخواست ہے کہ میری غیرموجودگی میں وزارت کے امور نمٹانے کے لیے باضابطہ انتظام کیا جائے۔
