نواز، مریم اور صفدر کے نام ای سی ایل میں ڈالے جائیں، نیب کا وزارت داخلہ کو خط

11

اسلام آباد: (فلک نیوز) نواز شریف، مریم نواز، حسن نواز، حسین نواز اور کیپٹن ریٹائرڈ صفدر کا نام ای سی ایل میں ڈالا جائے، نیب نے وزارت داخلہ کو خط لکھ دیا، ٹرائل آخری مرحلے میں ہے، قومی احتساب بیورو کا مؤقف۔

نیب ذرائع کے مطابق، نیب کی جانب سے وزارت داخلہ کو لکھے گئے خط میں مطالبہ کیا گیا ہے کہ نواز شریف، مریم نواز اور کیپٹن (ر) صفدر کے نام ای سی ایل میں ڈالے جائیں کیونکہ ملزمان کیخلاف مقدمات کا ٹرائل اختتام کے قریب ہے اور تینوں ملزمان کے بیرون ملک فرار ہونے کا خدشہ ہے کیونکہ نواز شریف، مریم نواز اور کیپٹن (ر) صفدر نے بیرون ملک جانے کی اجازت دینے کی درخواستیں دائر کر رکھی ہیں۔

سینیٹر پرویز رشید نے نواز شریف، مریم نواز اور کیپٹن (ر) صفدر کے نام ای سی ایل میں ڈالنے پر اپنے ردعمل میں کہا ہے کہ نیب ٹرائل کا سامنا کرنے والوں کو ٹارگٹ نہ کرے، شریف خاندان عدالتوں کے سامنے خود کو جوابدہ سمجھتا ہے، نواز شریف، مریم نواز اور کیپٹن (ر) صفدر مسلسل عدالتی کارروائی کا حصہ ہیں، ایک دن میں 2، 2 بار بھی عدالتوں کے روبرو پیش ہوئے، کیس کے دوران نواز شریف اور مریم متعدد بار بیرون ملک گئے اور واپس آئے۔

پرویز رشید نے مزید کہا کہ احتساب سے بھاگنے اور خود کو عدالتوں سے بالاتر سمجھنے والوں کو ملک میں واپس لائے، نیب کا منفی اقدام عدالتی عمل پر اثر انداز ہونے کی کوشش ہے۔