سینیٹ اپوزیشن لیڈر کا محاذ گرم، پیپلز پارٹی اور پی ٹی آئی آمنے سامنے آ گئیں

34

اسلام آباد: (فلک نیوز) چیئرمین اور ڈپٹی چیئرمین سینیٹ انتخاب کے بعد اپوزیشن لیڈر کا محاذ گرم ہو گیا، سینیٹ میں قائدِ حزبِ اختلاف اور اپوزیشن کی دو بڑی جماعتیں آمنے سامنے آ گئیں۔ پیپلز پارٹی نے اپنا اپوزیشن لیڈر لانے کے لئے مشاورت شروع کر دی جبکہ تحریکِ انصاف نے بھی اپوزیشن لیڈر کا عہدہ اپنا حق قرار دیدیا۔

چیئرمین اور ڈپٹی چیئرمین سینیٹ کا معاملہ ختم ہوتے ہی اپوزیشن لیڈر کے لئے محاذ گرم ہو گیا ہے۔ پیپلز پارٹی نے سینیٹ میں اپنا قائدِ حزب اختلاف لانے کے لئے مشاورت شروع کر دی ہے۔ سینیٹر شیری رحمان قائدِ حزب اختلاف کی دوڑ میں سب سے آگے ہیں جبکہ سابق چیئرمین سینیٹ فاروق ایچ نائیک کو بھی قائدِ حزب اختلاف بنانے پر مشاورت جاری ہے۔ پی پی قیادت پارٹی کے اندر مشاورت کے ساتھ ساتھ اتحادیوں کو بھی اعتماد میں لے گی۔

سینیٹ میں قائدِ حزب اختلاف کے عہدے کے حصول کے لئے تحریک انصاف بھی میدان میں آ گئی ہے۔ تحریکِ انصاف نے سینیٹ میں قائدِ حزبِ اختلاف کا عہدہ مانگ لیا ہے۔ مرکزی ترجمان پی ٹی آئی فواد چودھری کا کہنا ہے کہ سینیٹ میں اپوزیشن لیڈر تحریک انصاف کا حق ہے۔ اپوزیشن جماعتوں سے رابطوں کا ٹاسک سینیٹر اعظم سواتی کو دیدیا گیا۔