امریکا پوری امداد بھی روک دے تو پرواہ نہیں: مشیر خزانہ کا دو ٹوک اعلان

24

اسلام آباد: (فلک نیوز) مشیر خزانہ کا کہنا ہے اگر امریکہ ہماری پوری امداد بھی منسوخ کر دے تو کوئی پرواہ نہیں، چند لاکھ ڈالر کی خاطر ہم اپنی سکیورٹی اور قومی مفاد کو داؤ پر نہیں لگا سکتے۔
غیر ملکی اخبار فنانشل ٹائمز کو انٹرویو دیتے ہوئے مشیر خزانہ مفتاح اسماعیل نے کہا کہ امریکہ اور بھارت مل کر پاکستان کو بدنام کرنے کی کوشش کر رہے ہیں۔ انہوں نے کہا پاکستان ساتواں بڑا ملک اور ہمارے پاس دنیا کی 7 ویں بڑی فوج ہے۔ ان کا کہنا تھا خطے میں امن کے قیام کے لیے جو کچھ ممکن ہے پاکستان کر رہا ہے لیکن پاکستان کی جانب سے دی گئی قربانیوں اور کوششوں کی دنیا سے وہ پزیرائی نہیں مل رہی کہ جس کا پاکستان مستحق ہے۔

مشیر خزانہ مفتاح اسماعیل نے مزید کہا حکومت منی لانڈرنگ کے سدباب کے لیے کافی اقدامات لے رہی ہے، غیر ملکی کرنسی اکاونٹ میں 1 لاکھ ڈالر سے زائد رقم رکھنے والے کو وسیلہ آمدن بتانے کے لیے پابند کیا گیا ہے۔ اس کے علاوہ بیرون ملک بنائے گئے اثاثے ظاہر کرنے والے پاکستانیوں کے لیے ایمنیسٹی اسکیم متعارف کرائی جارہی ہے۔

فناننشل ٹائمز کے مطابق پاکستان سے تعلقات میں سرد مہری امریکہ کی افغانستان میں جنگ ختم کرنے کی کششوں کو نقصان پہنچا سکتی ہے۔